Wararka ka imaanaya dalalka Hindiya iyo Pakistaan, ayaa tilmaamay in dabeylo xoogan ay ku dhufteen deegaannada dhaca xeebaha, taasoo geysatay waxyeello kala duwan.
War kasoo baxay hay’adda Sahdaasha hawada ee dalka Hindiya, ayaa lagu sheegay in la filayo in dabeyluhu ay sii xoogeystaan, maadaama dalku ay weli roobab ka da’ayaan.
Inta la xaqiijiyay ugu yaraan 3 ruux oo Hindi ah ayaa ku dhintay dabeylahan ku dhuftay deegaanno dhaca xeebaha dalka Hindiya, waxaana jira guryo burburay, halka ay xirmeen dhaq-dhaqaaqyadii ganacsi ee deegaannadaas iyo kuwa waxbarashada.
Pakistaan oo isaguna deris la ah dalka Hindiya, ayaa sidaasoo kale waxaa ka jira dabeylo xoogan oo ku dhuftay deegaannada dhaca xeebaha, dalkan ayaana waxaa ka da’aya roobab mahiigaan ah.
Kooxaha gurmadka deg-dega ah ayaa tilmaamay in ugu yaraan 12 ruux ay dhinteen, kadib markii ay simbiriraxdaan, oo ay ku dhaceen haadaamo uu roobku sababay.
