Tafaasiil dheeraad ah ayaa laga helayaa dil qorsheysan oo saacadihii lasoo dhaafay ka dhacay degmada Caabudwaaq ee gobalka Galgaduud.
Wararka ka imaanaya Caabudwaaq ayaa sheegaya, in ugu yaraan 2 ruux oo rayid ah lagu dilay degmadaas.
Dilka ayaa waxaa geystay nin ku hubeysan qoriga AK-47, waxa uuna dilku si gaar ah kaga dhacay halka loo yaqaanno Barxada Roob Da’ay ee degmada Caabudwaaq.
Labada ruux ee shacabka ah ee la dilay ayaa lagu kala magacaabaa Faarax Faatax iyo Cali Najax Cabdul, waxaana dilka kadib goobta isaga baxsaday gacan ku dhiiglaha.
Illaa iyo hadda majiro wax war ah oo kasoo baxay maamulka la baxay Galmudug ee ka arrimiya magaalada, kaas oo ku aaddan dadka rayidka ah ee lagu dilay degmada Caabudwaaq.
Degmadaan ayaa waxa ay kamid tahay degmooyinka gobalka Galgaduud ee ay ka dhacaan dilalka salka ku haya aanooyinka qabiil, iyadoona marar badan uu gobalku marti galiyay dagaal beeleedyo udhexeeya beelo walaalo ah oo wada dega gobalkaas.
