Wararka ka imaanaya gobalka Sh-hoose ayaa ku waramaya, in aroornimadii hore ee maanta uu gobalka ka dhacay, dagaal udhexeeyay ciidamo katirsan maamulka la baxay Koonfur-galbeed iyo maleeshiyaad hubeysan.
Dagaalka ayaa waxa uu ka dhacay degaanka Yaaqbari-weyne oo katirsan gobalka Sh-hoose.
Ciidamada maamulka la baxay Koonfur-galbeed, ayaa lasoo warinayaa iney iyagu weerarka ku qaadeen degaanka, kuwaas oo iska caabin kala kulmay maleeshiyaadkii goobta ku sugnaa.
Waxaa lasoo warinayaa in labada dhinac ee dagaallamay uu soo gaaray khasaare isugu jira dhimasho iyo dhaawac, walow aanan helin halka uu gaarsiisan yahay.
Degaanka ayaa waxaa mudooyinkii dambe ka taagnaa xiisado udhexeeya labada dhinac, kuwaas oo marba marba ka dambeysa cirka isku sii shareerayay, balse maanta ayuu si rasmi ah halkaasi uga qarxay dagaalka udhexeeya darafyadaan.
Maleeshiyaadka ku sugan degaanka Yaaqbari-weyne ayaa maamulka la baxay Koonfur-galbeed ku eedeeyay inuu weerar kusoo qaaday degaanka, iyagoona ku hanjabay iney iska caabin doonaan.
