Xogo dheeraad ah ayaa laga helayaa shil geystay khasaare kala duwan oo isugu jira dhimasho dhaawac, kaas oo markale laga soo tabiyay dalka Kenya.
Ugu yaraan 13 ruux ayaa la xaqiijiyay iney ku dhinteen, tobannaan kalena ay siyaabo kala duwan ugu dhaawacmeen shilkaan gaari oo si gaar ah kaga dhacay wadada weyn ee isku xirta Mandiqadda Nakuru iyo magaalada Eldoret ee dalka Kenya.
Shilka ayaa yimid, kadib markii gaari Bas ah oo ay saarnaayeen dad rakaab ah oo kasoo baxay magaalada Kisimu kuna sii jeeday magaalada Mombasa ay isku dhaceen gaari kale.
In ka badan 55 ruux oo kale ayaa lasoo warinayaa iney ku dhaawacmeen shilkaan, kuwaas oo qaarkood ay soo gaareen dhaawacyo halis ah, waxaana laga cabsi qabaa in tirada dhimashada ay kororto.
Hey’adda Bisha Cas ee dalka Kenya ayaa shaaca ka qaaday, in ugu yaraan 46 ruux oo qaba dhaawacyo kala duwan la geeyay isbitaallada ku yaalla dalkaas.
Dalka Kenya ayaa waxaa ku badan shilalka nuucaan ah, waxaana mudooyinkii lasoo dhaafay uu koror xad dhaaf ah ku yimid shilalka, kuwaas oo qallaaftay nolosha boqallaal ruux iyo dhaawaca kuwa kale.
Hoos ka Daawo Sawirrada:
