Ciidamada Xarakada Mujaahidiinta Al-Shabaab, ayaa saacadihii lasoo dhaafay waxay fuliyeen, silsilado weeraro kala duwan oo lagu beegsaday ciidamada Shisheeyaha, Askarta Dowladda Federaalka iyo kuwa maamul goboleedyada.
Muqdisho, rag hubeysan oo katirsan Xarakada Mujaahidiinta Al-Shabaab ayaa suuqa Qudaarta ee Bakaaraha, waxay ku toogteen askari katirsan ciidamada Dowladda Federaalka, bastoolad uu wateyna way ka furteen.
Shabeellaha Hoose, illaa 4 qarax ayay ciidamada Xarakada Mujaahidiinta Al-Shabaab la beegsadeen, askarta Shisheeyaha Uganda oo ku socdaalayay inta u dhexeysa Nambar 60 iyo deegaanka Buufow ee isla gobolka.
Khasaare kala duwan oo isuga jira dhimasho iyo dhaawac ayaa la rumeysanyahay inuu gaaray ciidamada Shisheeyaha, goobtana waxaa kusoo degatay diyaarad hellicopter ah oo qaaday dhaawacyada iyo meydadka.
Isla gobolka Shabeellaha Hoose, gudaha degmada Afgooye ayay ciidamo katirsan Xarakada Mujaahidiinta Al-Shabaab, waxay ku toogteen askari katirsan booliiska Dowladda Federaalka oo lagu magacaabi jiray Xasan Dananow.
Baay, ciidamada Xarakada Mujaahidiinta Al-Shabaab waxay saaka weerar culus ku qaadeen saldhiga ciidamada maamulka Koonfur galbeed ee deegaanka Awdiinle ee dhaca duleedka magaalada Baydhabo. Labo askari ayaa ku dhaawacantay weerarka.
Bakoolna, waxay ciidamada Xarakada Mujaahidiinta Al-Shabaab weerar ku qaadeen saldhiga ciidamada maamulka Koonfur Galbeed ee degmada Waajid, lamana oga khasaaraha rasmiga ah.
