Wararka ka imaanaya deegaannada la heysto ee dhulka Filastiin ayaa ku waramaya, in weerar khasaare dhaliyay lagu qaaday ciidamada Sahaaynida Yahuudda ee gumaadka kudhawaad sanad ka geysanaya Filastiin.
Weerarka oo ka dhacay galbeedka magaalada Al-Jaliil ee Daanta-galbeed ayaa waxaa lagu qaaday ciidamo Yahuud ah, ragga fuliyay weerarka ayaana si degdegsiimo leh u dilay tiro ciidamo Yahuud ah.
Warbaahinta maamulka Yahuudda waxay shaaca ka qaadeen in weerarka uu ahaa mid qorsheysan oo muda kooban socday, uuna geystay waxyeello isuga jirta dhimasho iyo dhaawac.
Inta haatan la xaqiijiyay waxaa weerarka lagu dilay ugu yaraan 3 askari oo katirsan ciidamada booliiska Yahuudda, mid kamid ah askarta dhimatay ayaana u geeriyooday dhaawac kasoo gaaray weerarka.
Ragga fuliyay weerarka ayaa si nabadgeliyo ah uga baxsaday goobta, waxaana ciidamada Yahuudda ay wadaan baaritaanno ay ku baadi goobayaan raggan, magaalada Idna oo u dhow goobta uu weerarka ka dhacay ayaana ciidamada Yahuudda waxay kusoo rogeen go’doomin.
