Saxaabadu waa Jiil Fariid ah oo aan iyagoo kale marnaba aaney dhici karin in dunida lagu arko, dad meelo qaar ka shabaha mooye, waxay ahaayeen halyeeyo garab istaagay Suubanaha Salla-llaahu caleyhi wasallam, markii uu geeriyoodeyna xambaaray amaanada ah in Xaqqa la gaarsiiyo dunida, iyagoo sida Kitaab Wax hanuuniya iyo Seyf u gargaarta.
Tobanaan kamid ah Saxaabadaas waxay ahaayeen hogaamiyaal ciidan iyo maamul, intii uu Rasuulka Salla-llaahu caleyhi wasallam noolaa ayuuna masuuliyaad ku aaminay, taasoo muujineysa manziladda sareysa iyo makaanada muuqata ee ay kaga soocmeen asaagooda.
Hadaba silsildan oo aan ugu magacdarnay “Jeneraalladii Jihaadka ee Rasuulka ﷺ” waxaan kusoo gudbineynaa inkabadan 30 hogaamiye ciidan, oo katirsanaa Saxaabada Ridwaanullaahi caleyhim.
