Wararka naga soo gaaraya dalka Iiraan, ayaa ku waramaya in gaari rakaab ah oo ay saarnaayeen dad aad u farabadan uu ku rogmaday dalkaas, taasoo keentay dhimashada dad badan.
Gaariga baska ah ayaa waxaa saarnaa dad Pakistaaniyiin ah oo kusii jeeday dalka Ciraaq, waxaana gaariga uu rogmaday xilli uu marayay bartamaha dalka Iiraan.
Goobjoogayaal ayaaa soo sheegay in gaariga uu rogmaday xilli uu marayay bar kontorool oo ku taalla gobolka Yazid ee dalka Iiraan, markii uu rogmaday kadibna uu dab ka kacay.
Dowladda Iiraan ayaa war ay soo saartay waxay ku sheegtay, in ugu yaraan 28 ruux oo Pakistaaniyiin ah ay ku dhinteen shilka gaariga, dadka dhinteyna ay kusii jeedeen dalka Ciraaq.
Sida muuqata dadka shilkan ku dhintay ayaa ahaa shiicada tiradayar ee degta dalka Pakistaan, waxayna kusii jeedeen dalka Ciraaq, oo ay doonayeen iney kaga qeybgalaan xus ay sameystaan kooxaha shiicada ah.
