Roobab mahiigaan ah ayaa ka da’ay buuraleyda iyo saxaraha wuqooyiga Afrika dhamaadkii horaantii todobaadkan, kuwaasoo geystay waxyeello kala duwan.
Roobabka ayaa meelaha ay ka da’een waxaa kamid ah dalalka Aljeeriya iyo Marooko ah oo ah dalal deris ah oo dhaca galbeedka caalamka Islaamka, waxaana ay halkaasi ka geysteen khasaare isuga jira dhimasho iyo burbur.
Masuuliyiin u hadlay dalalka Aljeeriya iyo Marooko, ayaa sheegay in roobabak da’ay ay ka badnaayeen kuwii la filayay, meelaha roobaka badan uu ku da’ayna waxaa kamid ah goobo sanadkii hore ay ka dhecene dhul gariir khasaare baaxad leh geystay.
Marooko, waxay roobabku ku dileen 11 ruux, kuwaasoo badankood ku dhintay deegaanada baadiyaha ah, roobabka ayaana saameeyey dhismayaasha iyo adeegyada bulshada sida korontada, waxaana jira dad aan nolol iyo geeri lagu heynin oo ay daadadku qaadeen.
Afhayeen u hadlay wasaaradda arimaha gudaha ee dalka Marooko, ayaa sheegay in ugu yaraan 40 guryo ay burbureen, deegaannada qaarna ay isgaarsiintu ka go’antahay, dowladuna ay isku dayeyso iney halkaas gurmad gaarsiiso.
Dhanka Aljeeriya, wasiirka arimaha gudaha dalkaas Ibraahim Muraad ayaa sheegay in roobab xoogan ka da’een deegaannada saxaraha ah, inta haatan la xaqiijiyeyna ay 5 ruux ku dhintene daadadka.
