Ciidamada Ruushka ayaa duqeyn ku garaacay mid kamid ah magaalooyinka dhaca xadka dalalka Ruushka iyo Ukraine, oo uu dagaalkooda galay inkabadan 2 sano oo xiriir ah.
Magaalada Miikoolaayf, ayaa la kulantay weerar duqeyn madaafiicda goobta ah, waxaana duqeyntu dhalisay waxyeello isuga jirta dhimasho, dhaawac iyo burbur.
Inta la xaqiijiyay waxaa duqeynta ku dhintay haweeney Ukraine ah, halka ay ku dhaawacmeen ugu yaran 16 ruux, kuwaasoo heerarka dhaawacyadoodu kala duwanyihiin.
Muuqaallo Internetka lasoo dhigay ayaa muujinaya guryo ku dumay duqeynta, dhinacyada Ruushka iyo Ukraine ayaana is dhaafsada duqeymo ka kala dhaca labada dal, kuwaasoo geystay khasaare kala duwan.
Ma muuqato ifafaalo ka tarjumeysa inuu soo afjarmayo dagaalka u dhexeeya Ruushka iyo Ukraine, wuxuuna dagaalkani yimid kadib markii Ruushku kusoo duuleen Ukraine horaantii sanadkii 2022-ka.
